مدينة السحر والجمال والعلاج البيئى
هنحكى رحلة سيوه خطوه بخطوة ابتداء من خروجنا من القاهرة
المسافة من القاهرة الي سيوة كبيرة علشان كدة هنقسمها بطريقه كويسة
من القاهرة إلى وادى النطرون 120 كيلو ، بعد الرست بعشرة كيلو هنركب اول كوبرى هيقابلك على الطريق السريع مش من الخدمات
من وادى النطرون إلى الساحل الطريق هيخدك امام مارينا 4 دا بعد 140 كيلو
من الساحل إلى مطروح حوالي 180 كيلو
انا قسمتها علشان متحسش ان المسافة بعيدة لما أقولك من القاهرة إلي سيوه 740 كيلو
طيب فى َحلين ، الحل الاول إما أكمل على سيوه ودا عاوز واحد فايق اوى ونايم كويس اوى لان انا اخدتها فى العودة سايق 10 ساعات بدون استراحات يدوب في البنزينة
والحل الثانى انك تنزل مطروح فى اى فندق او شقة تريح فيها وتنزل تعمل سنوركلينج ومع الغروب تروح شاطئ عجيبه وتنام كويس وتصحى 6 صباحا تبدأ النصف الثانى من الرحلة
من مطروح إلى سيوه 300 كيلو ، أول 150 كيلو زى الفل طريق مزدوج حارة رايحه وحارة جايه مفيش اى مشكله غير مطبات عاديه ، مفيش بنزينة غير علي ال 150 ك مع اول تفتيش بنزينة وطنية
وفيها ماركت ومشروبات ساخنه وحمامات نظيفة والشباب وقائد المحطه أولاد محترمة وظريفه جدا
تبدأ رحلة المعاناة من بعد 37 كيلو 187 الطريق مدغدغ بطريقة بشعة تمشى بالسيارة على سرعه 10 كيلو فى الساعة ومن اقصى الشمال الى اقصى اليمين 23 كيلو بتخلصهم فى ساعه او ساعه وربع
وبعد كدا الطريق يبقى معقول زى الاول مع العلم ان فى منحنيات خطرة قبل سيوة ب 10 كيلو
اما مدخل سيوة عبارة عن مدخل قرية لايرتقى بمدخل مدينة عالمية طريق صعب جدا( ولما راجعت اهل البلد والشيوخ هناك وسالتهم قالوا ان الطريق كان المفروض يخلص من فترة بس بسبب فيروس كورونا
مفيش عمال والعمل كان شبه متوقف ، وان المحافظ وعد ان طريق سيوه هينتهى قبل عيد السياحة السيوى اخر اكتوبر وبعد كدا هيشوفوا مدخل سيوه)
وانت داخل سيوة بتلاقى على يمينك جبل الموتى وبعديها على اليمين هيئة تنشيط السياحة وتلاقى فى وشك قسم شرطة سيوة تدخل شمال ويبقى على يمينك القسم ،
فى أول يمين تلاقى نفسك فى سوق سيوة السوق عبارة عن شارعين متفرعين من الشارع الرئيسى ويمين الشارع الرئيسى قلعة شالى القديمة
آخر الشارع الرئيسى بعد الجامع الكبير هيبقى مدخل فندق واحة سيوة والمعروف بفندق الجيش والاهالي يعرفوه باسمه القديم فندق مبارك
والوصف الدقيق للناس اللى بتعشق التفاصيل خطوه بخطوة
فندق واحة سيوة : مساحته كبيرة وممتازة عنده 65 غرفة دا غير 20 غرفة علي الشكل البيئي ، وعنده 4 اجنحة ( الجناح ريسبشن وغرفتين وحمام )
و3 أجنحة vip فيلا مستقلة الجناح عبارة عن 3 غرف و3حمامات و ريسبشن ومطبخ للتجهيز فقط ، وفي حمام سباحة عين طبيعية من الأرض
وكل الشكر والاحترام والتقدير للعقيد/ مصطفى مدير إدارة الفندق شخصية محترمه جدا ويقابلك بإبتسامة جميلة يحسسك انك فى بيتك مع أخوك وبنفس الإبتسامة بيقابلك العاملين بالفندق ،
وعندهم كافيتريا فى حضن الجبل بتشتغل من 7 م الى 2 ص رائعة وكلها أنوار ملونه لنزلاء الفندق أو غير النزلاء وأسعارها ممتازة بس هتطلع 61 سلمة عشان توصل فوق بس السلم مريح وعريض
بعد ما وصلت كلمت صديق سيوى هناك اسمه : يوسف السيوى شاب ونعم الادب والاخلاق والامانة وهو شغال فى السياحة فى سيوه وجالى صديقى وبدأنا أول جولتنا
بحيرة الملح : عبارة عن بحيرات مالحة نسبة الاملاح فيها بتصل 98% مجرد ما بتنزل فى البحيرة بتلاقى جسمك بيطفوا وانت سايب نفسك خالص ،
وبما اني مش باعرف اعوم حاولت اتقلب على وشى ودخلت ميه مالحة فى عينى وشربت منها لك ان تتخيل مفتحتش عينى الا بعد نصف ساعه وطعم الملح فى شفايفى طول اليوم
بحيرة الملح بتسحب الطاقة السلبية من الجسم وبالنسبة لى كمان شربت شربة ملح
بعد بحيرة الملح روحنا كامب : على خالد
الكامب فيه عين طبيعية سخنه وعين طبيعية باردة تدخل فى واحده وتطلع منها تدخل فى التانيه أصعب حاجه فى العيون الطبيعية دى هى الطحالب اللى بتبقى عايمة على وش المياه أو فى أسفل العين
والعيون مش عميقه طولها حوالى 170 سم بس الأرض ممكن تزحلقك عشان الطحالب اللى فى الارضية وعلى السلالم داخل العين
أما كامب على خالد بقي عبارة عن حديقة كبيرة مستغل فيها كل شبر، زارع فيها شجر وورد وزرع وأى حاجه تتخيلها هو بيستعملها قلة مكسورة بيلونها ويربطها – زجاجة مياه بلاستيك كبيرة او صغيرة ـ جريد نخل – احبال ـ علب كانز
.... مفيش حاجه ممكن يستفيد منها إلا ومعمولة مع قعدات على كراسى من الخوص وعامل غرف للمعيشة بالمراوح والتكييف وعامل كمان خيام بشكل جديد الخيمة كلها بالخوص من بره ومن جوه مبطنها بالقماش وفارش فيها سراير
– وقعدنا وشربنا بعد الجولة دى شاى زردة باللويزا (براد شاى مغلى مع عشب اسمه لويزا زى ورق الليمون) – والكوبيات عبارة عن كوب صغير جدا على قد شفطتين وبعدين يصب لك تانى
خرجنا من الكامب وروحنا السوق علشان نتغدى قولنا نتغدى أبو مردم اللى بنسمع عنه وروحنا مطعم على عليوه ابو مردم دخلنا غرفة مفروشة بالسجاد والشلت على النظام العربى
وطلبنا فراخ مردم وروحنا شوفنا بتتعمل ازاى عبارة عن حفرة فيها نار بالحطب وفوقيها شبكة محطوط عليها الفراخ والبط والحمام ملفوف فى فويل ويتركوه مدة معينة
وبعد كدا يطلعوه جاهز للأكل ويقدموه مع باقى الطلبات، ولو قيمنا المطعم نقول 6من 10
وخرجنا من عند على عليوه وقولنا نطير بقى على أجمل منظر ممكن تشوفه فى حياتك منظر غروب الشمس فى جزيرة فطناس ع
لى فكره مهما حد صور لك المكان او حكى لك عنه غير لما تشوفه بنفسك الغروب فى سيوة كان 7.20 احنا موجودين من 6.30 بنراقب تغيير شكل السماء والبحيرة ومتابع مع الكاميرا خطوه بخطوه غروب الشمس
والجزيرة فيها قعدة لذيذه جوه المياه وحولينا النخل منظره بديع أنا أخذت له صور كثيرة أوى من كثر جمال المنظر –
وممكن فى الكافتريا تطلب أى مشروب لأن الدخول للجزيرة له رسوم دخول بيخدها صاحب المكان وعلى الساعة 8 خرجنا من الجزيرة وفى عودتنا رحنا علي
فندق دريم لودج : مع يوسف الجايد بتاعنا – الفندق فى 2 حمام سباحة واحد شغال والثانى مغطى وفى داخل الفندق كهف ملح خاص بالنزلاء أو من خارج الفندق
اما بالنسبة للغرف تحس انك قاعد فى دار بيئي كل اسقف الغرف على شكل قبب ومعمولة بالطوب الجبلى والديكور البيئى والسجاد اليدوى
تحس إحساس حلو بخلاف القعدات اللى حوالين حمام السباحة وقفص عصافير كبير فى أنواع كثيرة – تحس بالراحة فى الفندق والخصوصية لأن كل غرفة ليها زى سلم لوحدها وفى غرف بتتعمل عندهم بالملح الغرفة كلها
يعنى تنام فى الغرفة وتطلع منك الطاقة السلبية وأنت نايم
الريسبشن بتاعهم صغير وفى طبلية وصينية وبراد على شكل البيئة المحيطة .
ده وصف دقيق لفندق دريم لودج عشان لو مش حابب تنزل فى فندق واحة سيوه عندك اختيارين لفندقين مستواهم مختلف
وبعدين رجعنا فندق واحة سيوة ومكنش ينفع ننام قبل ما نطلع 61 سلمة اللى على الجبل
علشان نستمتع بالمنظر الساحر من فوق الجبل تشوف سيوة كلها وتشرب حاجه دافية وتستتنشق شويه هواء نظيف خالية من اى كورونا دا كان اول يوم فى سيوة
اليوم الثانى
رحنا إلى جبل الدكرورى والمكان ده بيتعمل فى كل سنة من اكثر من قرن ونصف تجمع بيستمر 3 ايام بلياليهم فى الليالى القمرية من شهر اكتوبر وكل اهل سيوة بتخرج لجبل الدكرورى ويقيموا الاحتفالات
والأكل والشرب مع بعض طوال فترة الاحتفال بالنسبة للأهالى بيقعدوا تحت الجبل المكان الممهد أما شيوخ القبائل كل شيخ بيقعد فى غرفة من اللى معمولة فوق الجبل
وفى مقعد كبير فوق لكل شيوخ القبائل وقت الاكل وبيبقى فيه منتجات سيوة للسائحين وفلكلور سيوى والسياح بيروحوا الفترة دى ويقعدوا مع الأهالى ويشاركوهم احتفالاتهم
نزلنا من جبل الدكرورى رحنا معبد وحى آمون أو التنبؤات وشهرته التاريخية أن الأسكندر الأكبر قام بزيارته عام 31 ق.م وبعدها رحنا معبد أم عبيده اللى تم تشييده لعبادة الملك آمون
وبعدها رحنا على عين كليوباترا بير مياه طبيعية بس العين دي عميقة للى مش بيعرف يعوم
وخلصنا كدا جولتنا النهارية ونزلنا السوق واتغدينا عند مطعم اسمه عبده اكله كويس بيعمل بيتزات ومكرونه ومتنساش تدوق المكرونة المبقبقة ودى أكله عربية ليبية
وبعد كدا خدنا عربية لاند كروز طلعنا بيها بحر الرمال الاعظم طبعا دى مغامرة مش ممكن تفوت حد تبقى فى الصحراء
ومرة واحدة تلاقى نفسك فى أعلى منطقة جبلية وتنزلها بسرعه رهيبة حاجه مهما الواحد يحكى عنها مش هتحسها غير لما تجربها
وفى وسط البحر دا من الرمل فى حفريات من ملايين السنيين ايام ماكان المكان ده جزء من البحر أو المحيط وفى بقايا عظام حوت وقواقع متحجرة ونجوم بحر متحجرة
وفى وسط الرمال دى هتلاقى بحيرة مياه باردة تنزل فيها وبعد شويه فى بحيرة مياه سخنه او دافيه اسمها بير واحد
دا اول بير تم اكتشافه فى سيوه من شركة تنقيب بترول – وبعد كدا تقعد على سفح الجبل تشوف الغروب وتشرب الشاى باللويزا لغاية الشمس ما تغيب ونغيب احنا كمان ونروح عشان نبدء ثالث يوم
اليوم الثالث
بدأنا اليوم بقلعة شالى القديمة ودا كان مكان سكن أهل سيوة زمان كل اسرة لها غرفة من الغرف اللى فى القلعة وبعدين طلعنا على جبل الموتى –
وبعد كدا زرنا الأماكن تصنيع الملح بيعملوا اباجورات من الملح وطفيات سجاير وأشكال جميلة من الملح وملح ألوان – منه يسحرك بشغلهم ومنه ينزع الطاقة السلبية من الجسم ويعطيك طاقة إيجابية متجددة
وبعدين طلعنا على محلات المشغولات اليدوية واللبس السيوى وبعد الغدا اتحركنا على
جزيرة طغاغين : علشان نشوف غروب الشمس من مكان تانى بس مشكلتها انك بتمشى بالسيارة حوالى 3 كيلو فى مدقات فى وسط المياه لغاية ماتوصل الجزيرة وفعلا منظر الغروب فيها رائعه وفيها رسوم دخول طبعا للمكان
اللى عجبنى جدا غير منظر الغروب والقعدة الساحرة والهواء النقى ان فيه 5 جزر حولين الجزيرة الكبيرة اللى احنا فيها بنروحهم بمركب صغير فلوكة ممكن تأجر الجزيرة دى لك لوحدك انت وأسرتك
او ممكن مجموعة يروحوها مع بعض جزيرة privet وممكن أنت تاخد معاك اكلك وشربك فيها وممكن حد يطلع معاك يعملك مشروبات تجربة جميلة فعلا وفريدة
انا ملحقتش ادخل الجزر دى لانى رحت على الغروب علشان كدا صورتها من بعيد – وبعد الغروب رجعنا على الفندق علشان نبدء اليوم الى بعده جولة الردم والدفن فى الرمل
من شروطه انك مينفعش تروح بعده اى مكان فى هواء أو تقعد في مروحة او تكييف او تشرب اى مشروب بارد –
والشرط الأهم انك طوال فترة الردم ممنوع الاستحمام نهائى لاخر يوم ردم وإلا جسمك هيتعب جدا لان مسام الجسم بتبقى مفتحة .
رحلة الدفن او الردم فى الرمل ده اهم جزء فى الرحلة ركز معايا
بنروح الأول تحكى للشيخ ايه اللى بتشتكى منه روماتيزم – روماتيد – آلام المفاصل – آلام الكتف – انزلاق غضروفى – تخسيس ( سمنة دهون وليس هرمونات )
مع العلم ان الدفن عموما يصلح لجميع الأصحاء والمرضى لانه عبارة عن تنشيط لكل اجهزة الجسم – فى درجة حرارة الرمل تعمل على سرعه جريان الدم فى الجسم
وممكن وأنت بتشرح ايه اللى عندك للشيخ يمنعك من نزول الرمل زى لو حد قلبه ضعيف ممكن ميستحملش الدفن او لو حد عنده كسر فى جسمه لم يمر عليه سنة او مركب مسامير او شرائح
او لو حد درجة حرارة جسمة العادية 38 ممنوع النزول
مريض ms ممنوع النزول
اى حاجه بعد كدا ينزل عادى حتى لو حد عنده سكر أو ضغط
وبناء علي المقابلة يقوم الشيخ بتحديد حالتك و كام يوم هيتم الدفن فى الرمل
مثلا مريض الروماتيد 7 ايام
الانزلاق الغضروفى والروماتيزم 5 ايام
الام المفاصل والكتف 3 ايام
بالنسبة للتخسيس 3 ايام علما بأن عملية التخسيس من نصف الى كيلو فقط فى اليوم حسب استجابة الجسم
معلومة مهمة الدفن بيتحسب باليوم مش بالليلة ولو سكنت عندهم سكن شعبي بيحسب لك السكن باليوم
وبنبدء الجولة بكهف الملح
وفى طريقتين للجلوس في الملح اما بتقعد على كرسي فى الكهف
او بتدفن أطرافك الذراعين والساقيين إلى الركبة ودا طبعا أفضل بكثير بتحس ان ايديك ورجليك بتنبض وانت فى الملح وبعد نصف ساعه بتخرج من الملح وتتجه إلى مكان ردم الرمل
مهم جدا يكون معاك لبس تقيل ولو مش معاك بتاخد من المركز زى روب كدا بتغطى بيه نفسك اول ماتطلع من الرمل
بتدخل الحفرة وانت لابس فقط شورت ومعاك فوطة اول مابتنام على الرمل يبدأ الشباب يردموا عليك الرمل بس بعد مايغطى العورة بالفوطة ويسحب الشورت وبعد كدا بيسحب الفوطه كمان لازم يبقى جسمك كله هو اللى فى الرمل
وبالنسبة للرأس بيعملوا لك زى مخدة من الرمل علشان رقبتك وبيعملوا دروة او شمسية للرأس علشان ضربة الشمس – بتفضل 10 دقايق وبعدين يجوا الشباب يغيروا الرمل اللي فوقك علشان بيبقى مبلول وننتظر 10 دقايق كمان
ويجيبوا بطانية يرميها عليك عشان تدخل الخيمة الخيمه لفرد واحد علشان بتبقى بدون ملابس نهائى وبيدخل لك 2 مشروب سخن عبارة حلبة وينسون وتشرب بالراحة
وكل ما الرمل يتبل تغير الرمل من الخيمة وتتقلب على جسمك كله والخيمة مصنوعة من ألياف معينة بتسمح بدخول الاشاعة الشمس ولا تسمح بخروجها
وانت قاعد في الخيمة حسب درجة استحمالك لان بتحس ان الأكسجين خلص من الخيمة ومش قادر تتنفس فى واحد ممكن يستحمل 10 دقايق وفي ممكن يستحمل نصف ساعه
لان انت بتفقد سوائل كثيرة جدا من جسمك وأملاح ، وبعد كدا بتلبس الملابس داخل الخيمة وتلبس عليها الكاب الثقيل وبتخرج من الخيمة وانت بتخرج بتحس بعدم اتزان فى الجسم
وفى حد من الشباب بياخدك تقعد فى غرفة على الاقل لمدة ساعتين وبيعمل لك مشروب ليمون وعليه خل علشان يعوض المفقود من الجسم وبعد ما تحس انك قادر تتحرك بتكمل يومك عادى بدون التعرض لاى مصدر هواء
اليوم الثانى والثالث نفس اليوم الأول بس بتقدر تجلس فترة أطول فى الخيمة وفى نهاية اليوم الثالث وبعد الساعتين الاستراحة بتروح تعمل مساج فى المركز بردو عبارة عن
زيت زيتون - خل تفاح - ليمون – ويدفي على النار ودا علشان يقفل مسام الجسم
(وبينصح لو محتاج حجامة ممكن تتعمل بعد المساج وكمان اخر نصيحة انك بعد المساج متستحماش على طول خلى الجسم يشرب الزيت على الاقل لمدة يوم )
وخلصنا الحمد لله ورجعنا على السوق اخدنا زيت زيتون وصابون زيت زيتون وشاى الصحراء مع لويزا
والجديد عندهم مربى الزيتون ومربي الكوسة ومربى الجوافة ومربي الرمان ومربى الكركديه (وان شاء الله يكون طعم الاختراعات دى كويسة )
وكان لازم نروح محل اعشاب نهار دين بتاع الدكتور مهدى ميمى اشهر دكتور فى سيوة بيعمل اعشاب لكل الامراض تقوله عندك ايه ويعطيك العشب المناسب او يعملك التركيبة الخاصة بيك
وخرجنا من السوق علي الفندق جهزنا شنطتنا واتحركنا الصبح بدرى للعودة الى القاهرة ودا ملخص بسيط عن اللي شفناه في سيوة
